Pemansang sekula sekalika ba kurikulum tauka ko-kurikulum beduduk ari kaul ti tegut sereta pengeransing ati raban PIBG mantu bala pengajar enggau staff sekula ti bukai ngereja pengawa ti patut digaga ngena cara begempung. Tuju iya nadai bukai, dikena ngemanahka kandang sekula sereta meransang runding anak sida ngambi chakah agi berajar ngulihka penemu.

 SK Nanga Bena di"ambu" perintah nyadi Sekolah Angkat 1Malaysia

Sekeda ari gambar kandang sekula SK Nanga Bena

SK Nanga Bena

Jenuh aku ngumpul buah runding ke baka dibubuh labuh,

Jeman nyau berebinan nepan ba kerungan kerubung pala,

Ngerawang jalai ngenang maya agi besekula menya,

Di Sk Bena menua linda menua mayuh pupu bansa,

Tang ukai mensia; bansa kayu bansa jelu,

Menua lindap menua celap,
Dedegi kayu tinggi ngelindung ngerayung.

Taun 1998 misah ari SK Bawai nitihka pengawa apai,

Tubuh tujuh mudik ai Balleh apai deriba nadai nyilih,

Nepan bangkung bandung perau panjai, mudik pagi datai lemai,

Menua baru bebida asai, rampa siga mimit nyelai, 

Empai ngelala urang bempu menua rakyat rumah panjai,

Mina semalam dua berasai enda nyamai,

Laban Iban sigi kur bekaul nyamai begulai,

Bekelala pagi, merarau bela kunsi, 

Ari beganti minggu, bulan nyadi taun, pengerindu bekaban tan bejeman.

Sekula Bena maya nya kelia enda beberita,

Nanyi baka leka padi, nembiak ASSEMBLY semuti ke bisi,

Pegai pengajar Henry Mamut, sekula sekut, mayuh gerubut,

Mayuh penguji sekula ulu sungai,

Pemakai nembiak jarai nyamai,

Ubi diparut, daun babas dibabut,

Enda mut-mut, pemandai diperebut.

Mindah tuai ke lama, ganti pengajar C.K. Buda,

Beduduk ari iya sekula seranta berinsur menyana,

Kaya enggau pemutus peresa ti nyulut, 

Nyadi ke buah mulut, terebai rita puput ribut,

Ditaburka ba TELEVISION kaban radio,

Bulih bantu GOVERNMENT enggau raban NGO.

Bisi pun bisi mega ujung,

Buah cukup tuai tingkil ari gupung, 

Udah atur perintah Seri Paduka Agung,

Peneka ngatur gerempung,

Apin tembu pengawa tuai ke dudi, ditandu pengajar Jonedi,

Bala pengajar meruan intu, PIBG seau sejaku,

Kaul mujur, rakyat enggau cikgu rindu begelumu,

Genara pengawa sekula, bala apai indai bedua ngereja,

Tusah tau mudah, berat nyadi lempung,

Bela besukung sama betulung, gawa gutung ruyung.

Bakanya meh teladan ke ngena,

Tau becuntoka rakyat SK Bena,

Mit peda mata, besai jelai berita,

Beduduk ari atur ke betul, utai nekul ulih mujur,

Mimit pan dibagi enda nengali, tubuh mayuh enda bechiping ati,
Enda beragih enggau pangan diri,

Siti penemu, siti tuju,

Tuai ngeluanka perau kayau rebak baru.

(GGR89, 24 Oktober 2016)

Pengawa begempung@gotong-royong ti seruran dikemeranka bala pengajar begulai enggau

'pekerja swasta' SK Ng Bena. Bala 'pekerja swasta' ke tebal agi endang peranak menua ai Sut empu. Pia mega bala apai indai nembiak ke bukai endang semampai nyukung pengawa ke diatur bala pengajar. Tajapan bisi sekeda ari sida nadai anak/uchu ti besekula ba sekula tu, sida nadai rita belampung ati ngenataika diri lebuh dipinta datai besaup lebuh bisi pengawa ba sekula. Endang lempung jari meri bantu ke ulih tubuh diri. Enda enggau duit tulung, tulang ga dianjung. Maya gawa sida deka bebendar sereta enda begantung tulang. Pengawa ke bakatu meh balat endar niri negika SK Ng Bena tu dataika saritu, lalu tampak rita agi ari ke dulu.

Baju ijau: YDP PIBG SK Ng Bena 

TR. Naga

Pengerapit kaul pengajar enggau nembiak tau bendar nyungkak tikas pemansang sekula. Pia mega ulah pengajar ti deka ibuh enggau kiruhka nembiak tau bendar nambahka pengeransing ati sida berajar enggau bebendar. Pengawa ke menyana digaga begulai tau mai pemanah ngagai psikologi nembiak.  

P/s: Aku temegah ati udah nyadi siku ari beribu alumni tauka nembiak ti kala besekula ba SK Nanga Bena. Taja sekula tu mit sereta enda tampak rita jelai nama (kelebih agi dulu kelia) baka sekula ba nengeri besai, tang diatu pemansang kelebih agi ba pemutus peresa udah majak manah. Singkang ti diasur pan majak panjai. Lalu pia mega berita pemujur pengawa sekula ti ngerekai mai insur ti besai amai reti ngagai nama SK Nanga Bena tu kelebih agi ba mata urang ari upis perajar. Pemandai enggau pengelandik ti diulih ukai bepanggai ba pemesai tauka pemanah endur kitai ngulih, tang ari pemesai pengandal enggau pengingin ati kitai ti deka nyengkau juluk ati ngena bemacam daya enda mayuh dalih. Apai aku kala bejaku, "dini-dini pan nuan sekula, enti nuan deka belajar nuan deka pandai".