Enti kita bisi pengelandik & penemu anang muntang ngetu, anang kakang ati nguji lalu deka badu. Pajak ke pejalai ngulihka penyamai. Kena meh pengelandik nya ba jalai ke betul ngambi bulih pemujur. Anang meda tusah lalu madah enda alah, angkat baru enti nyema teterap. Uji peda kita leka ujan, iya tetap muai diri ke baruh taja nemu bakani pemedih labuh.

Jerita Pangking Mit

Ibur jam 3 pagi,

ensugau ku angkat dani,

mata agi belala,

bekimbitka panggal luncung mua,

bebungkur enggau pua,

agi deka ngapuska mimpi,

memekang enda teantika tawas pagi.

Udu ngasi ga tunjuk jari malam tadi,

untak mansut, mulut minta saup, disangkung ulih patung,

20 jam pengelama, isakku ngipakka pengelelak,

enda ngawa, lagu udu laku, mayuh urang nemu,

mendingka radio ninga FULL SONG,

ke udah nemu belagu, ke baru ngensung,

pengerindu ari pangking mit, enda laka ruang sempit,

engka tau mai ringgit, menang pekit, ada ari bilik mit.

Enda besemaya aku badu, enda bejanji aku ngetu,

enda nginsit, isa' seminit,

buah penemu bejarit, penatai ngenyit,

awak keh tubuhku tebasau, ku enda ibau,

tiun ku lenyau, nya ngasuh irau,

buah penemu mayuh agi ari jam,

tang, there's never enough time!!!

enti lagu tembu, tubuhku layu, ulah nyau tuyu,

enda ku ensayau, ka iya jugau, lak mamau.

Aku ka nyadi LAGENDA, baka sida 3,

sepa jaga agi dikerindu, dikelulu,

1000 taun pengelama, tunda juta mensia,

dikelala macam pupu bansa,

ke pansik bala AHLI MUZIK,

dikenang ninting taun,

diangkatka ngena macam tiun.

Maya IDEA ngelaungka runding,

tunga pejalaiku enda dikuing,

pengeransing enggau pengelusu disapat,

pengerindu tu penapat,

penemu tu nadai tekat,

pagi malam jarai ayan, nangika pengawa aku kesuan,

enda bekaban, nadai pangan,

peneleba, pengelandik nya ke belayan.

Deka nyapai juluk ati,

enda takut ngatika diri,

bulih mangkuk tinggi REPUTASI,

ku enda surut berani nguji,

menang dalam gelanggang,

rebah ku merap tanah,

dudi ari aku nyili,

ke beduri nyadi asi,

ke cuka nyadi gula,

ke nyekang tau mai penyenang.

24 nov 2016