beserara enggau Tuai ti lama, nerima penatai Tuai ti baru

-

Gambar grafiti Tok Nan ba flyover Jalan Satok 
Tok Nan
Enti aku tegigaka Ini Inda Rabung Menua,
Deka aku ngasuh iya ngadaka nuan ari kelitak darah mensia.
Enti pengada nuan baka Raup Gama menyadi Bintang Muga,
Deka aku ngasuh Raja Petara negah nuan ngambi ngeleda.
Enti pun pengidup nuan ari perecik api,
Bejalai meh aku nyidi Dayang Racha ba selampur nenggeri.
Enti pemati anak Engga disili enggau Berauh Ngumbang,
Deka aku nguang ke sebayan betemu enggau Lulung seduai Kumang.
Tang utai udah nyadi,
Naka tu aja nuan begulai enggau kami,
Lama Petara udah nganti,
Meri awak ke nuan ga belelak gali,
Semengat nuan angkat melah langit tinggi,
Kami ba baruh semina ulih besampi,
Kemataka meh tanah kami,
Tela, peda meh menua kami.
Sapa ke nyadi ganti dipinta sama pemerani,
Tauka lebih ransing agi,
Laban menua kitai tu suah enda dikenati,
Perintah besai balat beciping ati,
Ngicaka tuai ke baru enda alah dikemeli, nitihka tunjuk jari gerempung dacin simpi,
Tuai ke udah rebah mai mayuh ubah,
Enda bepilih antah bepilih kubah,
Nya ke cuan, nya ke teladan,
Maju SARAWAK enti Tuai meruan,
Terima Kasih Tok Nan.


Kredit Gambar: https://assets.nst.com.my/images/articles/Nor_Shaddiq.transformed.jpg

Comments

Post a Comment

Popular posts from this blog

SELAMAT HARI SARAWAK 2022

-
Image
KAMI ANAK SARAWAK. Nyentuk ke saritu, haribulan saritu, ribu mensia ke begelar bujang berani udah lesi, lama udah ninggalka kitai, tang bekau jari sida ngasuh kitai idup nyamai, pemedis enggau pemar, rega ke patut dibayar, tanggung pengawa nembiak rebak baru, nyaga ngemata menua, sumpah enda mudah ngaku alah! MERDEKA! kitai rebak baru bejanji enda lemi, taluk ke menua enda bebagi ati, nampung pengawa aki ini kelia ngetanka menua, ngena chara baru, ngena penemu jeman diatu, KAMI ANAK SARAWAK, AGI IDUP AGI NGELABAN, ENDA ALAH KAMI DI TANAH, DI GELANGGANG TETAP MENANG! Kredit gambar: Instagram @enserapengidup Link:  enserapengidup
Read more

dini tanah diindik, dia meh langit disagu. aku anak menua ulu, teleba malai luchak nyenggulai lutak. aku anak urang rumah panjai teleba merinsa, enda minta, ngiga, masai jarai makai nyamai.

-
Image
Ngili Sungai Rejang, ka pulai ke rumah panjai. Tu meh dikangau urang sekayu ai Menuan pun ensurai bebini. Nyelai endar ga kayu tu baka ke nemu rinduka pangan diri. Beberap empikap, siku ba tanah berai kanan siku mua ke kiba. Ngetu matahka lengan ba rantu jalai. Nasit ai bisi kembai, enda bebatak kami sebuat. Ai chelum nya enda tau tinggal. Kena ngangatka isi you you. Rindu amai meda rampa menua ulu sungai. Likun dalam kandang dada. Nadai ngelui ari pemanah utai digaga Petara. Begelumu enggau bala diri petunggal, aya ibu, aki ini ti lama udah enda betemu. Taja kitai enda kaya enggau pengeraja, anang seranta enggau pengerindu sereta penyayau.  Tanju. Alai rakyat rumah panjai bejembuika padi, gari enggau ti bukai. Mega alai ngereja mayuh macam pengawa besari-sari. Sekula alai aku keterubah besekula menya. SRB Sungai Menuan. Primari 1,1996. Bilik tengah. Bedau diseruri & 'make-over' wai. Agi ngena kayu. Bilik ten...
Read more
-
Image
Bebandir batang rekung. Tudah aku tu, Baka ribut ke bepuput enda udu, Liut mansa kuyu, Ngasuh ati rindu, Chelap sekejap, Nyelat pengangat, Suah agi enda ditemu bisi, Semadi meda daun engkebut baru berupai, Kelebih agi maya lemai. Tang, Bisi maya aku bebali, Enda milih ari, Nemu balat, Tang ukai nengala ringat, Dikumbai urang kudi, Kita jampat ngeransi, Meri jaku jai, Ketegal aku inggar munyi. Kita ga sebana angat, Keba aku datai nulung, Engka sekeda lupa bebai tanggui payung, Ku datai matak remang, Mai penchelap, Mai pengelindap. Manah aku badu bemunyi, Upah kita ngumbai aku jai, Nerumban kita selalat muat gari di pengeredai, Nya aku nadai bepadah, Bebandir rekung kita minta sah, Aku besai nyawa kumbai kita mangah! Semina gambar pengias.  
Read more