Datai ba pengabis maya.

 

Datai ba pengabis maya.

Maya,

Nuan enda bekaki tang meruan nginsit besari-sari,

Ninting ari,

Enda alah aku gagai,

Makin aku ngerumban awak, makin nuan nadai,

Enda alah dilampat.

Maya,

Nuan mindah enda madah,

Uban genara,ngeli rarah,

Umur mega nambah, 

Tulang berasai majak gerah, 

Awak aku enda agi tubah,

mayuh diayah.

Maya,

Kelia pedis dikelala,

Enda berasai meleka,

Enda ulih dinga pending,

Enda ulih dipegai jari kanan kiba,

Nadai mega bau, nadai ayu.

Tang,

Jeman diatu bisi dikena di kuan,

Dikaitka ba dinding,

Ba kelinda ari bulan,

Ba talipaun bincing.

Nyah, ulih ga nuan ku peda,

Ku pegai, ulih mega diketuka,

Ngambi enda segenda nuan ngejang,

Ngichaka enda segala-gala nuan lelang,

Pemedih mayuh tebantai,

Lepi nadai diasai,

Rumah muru pulai,

Pendam ngelalu penatai.

P/S: Gambar rumah panjai admin. Gambar tu diambi maya taun 2019. Bejaku pasal maya, maya agi mit kelia admin sempat diau ba rumah ke begelegar buluh, bedindingka kulit kayu, makai asi ke dipanduk ngena api kayu enggau mayuh macham agi pengawa rumah panjai kelia ti bangat ngasuh ati sinu lebuh dikenang. Jai amat ga utai ke disebut 'maya' tauka awak, jam enggau mayuh leka jaku bukai ti sama tauka kurang lebih sebaka reti. Maya ngasuh umur kitai majak tuai, pengering kitai majak nadai. Tang enti nadai maya, kitai enda betambah penemu sereta penau. Kebuah pia, ari maya ke bejalai ari ke mindah, bulan ke betambah mih kitai tu belajarka utai ke baru mansai penemu ngena mayuh macam cara.