Bisi maya ujan ukai semina ngasuh basah, tang mega mai nasit manah.

Tikas pemandai, pengelandik mensia siku-siku enda sebaka. Taja ngembuan tikas pelajar ti tinggi ukai reti kitai tu nemu ngereja sereta meretika semua utai. Penemu bemacham rama, pemandai beribu gaya. Bisi sukut pengawa enggau buah runding kitai jauh alah tauka tinggal mimit ari enggi urang. Nya alai enti kitai ngembuan penemu anang sumbung anang enggai bedua enggau pangan. Pia mega enti bisi pengawa enda ulih dikereja kitai, nadai salah kitai minta tulung minta bagi penemu ari urang ke landik agi ngichaka pengawa ti deka dikereja enda tejanggal. 

Aram kita meratika lalu berundingka pengelandik aya siku tu. Dini meh iya teulihka penemu meri tambah nilai ngagai perengka pengangkut bakatu. Endang amai, motosikal ukai semina dikena ngundan mensia tang mega tau dikena ngundan barang. Ke suah peda kitai, motosikal ke suah diandalka ngundan barang iyanya motosikal roda tiga munyi ku jaku Laut. Tang penggi aya siku tu nyelai mimit. Kreatif enggau inovatif. Moto iya digagaka pelancha tauka endur manggai/nyangkingka barang. Nyadi pelancha nya didudukka ba atas seat motosikal, lalu endur iya empu duduk semuti ke chukup. Ukai siti dua aja barang ke ulih bai, ngelima enam iti barang pan agi Boleh Tahan. 

Aya tu menyadi kitai bansa Cina. Iya udah teleba kami sebilik, suah besambut jari tapa, selalu besaut jaku tanya enggau apai indai aku. Enti digagaka jerita, anak iya ti benama Ipa (ukai nama ke bendar) kala ditanka lutur ba sepital Kapit. Ipa kediri ba sepital nganti apai iya nguan lebuh malam ari. Kenu ku jaku tusi aya tu bini iya rari ninggalka seduai menyanak. Nya alai Ipa nguan diri empu laban apai iya kereja lebuh siang. Aki enggau ini Ipa ke dikarapka nguan udah tuai. Enda bepengerai.

Seninjik endar, maya nya menyadi aku ke biak mega ditanka urang ba sepital. Indai aku suah nyapi Ipa makai laban kasih meda iya nadai urang mela, nadai urang alai meraya. Beduduk ari nya meh kami teleba enggau apai Ipa. Pama bepansa sigi nanya. Kadang-kadang dibelika iya ai tin (ukai ai chabuk). Ukai semina ngembuan untak ti kreatif iya mega ngembuan ati ti manah, ingatka urang ti kala nulung. Urung pukul 1 tengah ari tadi iya ngandak kami sebuat lalu madah deka nulung ngundan, nganjung barang kami sebuat ke perau. Deka diberi upah, iya nulak. Tang enggai ga enda meri, ke tanda terima kasih. Kasih ke ya lelak sereta lama bejembi nganti express ke datai ari Belaga. 
Nyau ke lama-lama baru ya nyambut rambar duit ke disua. 

Ku ati aku, kitai ke nulung pangan diri ukai ketegal deka nundukka duit ngumbuk ringgit. Kitai betulung besukung laban kitai deka ngerapitka kaul enggau pangan ke dulu, lalu numbuhka kaul enggau kaban ke baru. Kitai enda nemu ni maya kitai begunaka tulung ari baik urang ke teleba tauka stranger (urang ti enda dikelala). Pia mega kitai betulung enda ngira chura kulit, ukai meda penebal dompet (kerepai ku jaku kitai). Ngarapka aya tu meruan mujur dalam semua pengawa sereta seruran gerai ngambi bisi ngibun Ipa ke bedau mekang-mekang umur empai nemu utai ulu ili. Nyadi kitai ke bisi tepedaka bala Tukang Angkut ke bakatu, nadai salah kitai ngasuh@ngaji sida. Kasih meh ke sida, sida pan baka kitai bela ngiga pemakai. Enda rugi urang ke manah budi, lalu nadai penguntung ga urang ke jai ati.