"enda rugi urang ke manah budi, enda untung urang ke jai ati".

  Makin mayuh utai dibaca, ngasuh aku mayuh agi berunding;  mayuh agi utai dipelajar, asai ke mayuh agi utai ke enda ditemu. Bup tau disema baka gudang penemu,  pengerindu kitai maca sereta pemerani betanya tau nyadi kunci dikena muka lalu ngulihka penemu dalam iya. Enti kitai sanggu sereta malu betanya ngujungka kitai tau limpang ke bukai,  salah jalai.

Dengah perintah. Enti kitai rakyat sengapa, Ngambi reta urang enggau pejal enggau pansal Ditangkap,  kurung dalam rumah pasung, Ketegal setin cap junjung ngisi perut kusung.  Sida pemesai ke bekuasa, Ngerampas juluk ati anak kitai Perengka pelajar disemaya nadai datai Kereban pengerai enda genap bantai Pengawa milih kroni ngambi anak pemesai Ditemu salah tang agi sekeda  deka setanah, Oh kasih iya, Oh sinu meda iya. Di nengeri luar disebut penchuri  Ditu digelar Perdana Menteri. Tau ngambi utai ukai ungkup nengali, Janji dek magi kami mimit, Janji bisi digalau laluh empa, Empa dek utai ke nyamai engkami makai tedai. Rakyat sekeda rindu ditundi, Teleba minta utai ke mit, Lalu lupa utai ke besai, Maya bepilih kami tetap nyunting nama dek. 

Bebandir batang rekung. Tudah aku tu, Baka ribut ke bepuput enda udu, Liut mansa kuyu, Ngasuh ati rindu, Chelap sekejap, Nyelat pengangat, Suah agi enda ditemu bisi, Semadi meda daun engkebut baru berupai, Kelebih agi maya lemai. Tang, Bisi maya aku bebali, Enda milih ari, Nemu balat, Tang ukai nengala ringat, Dikumbai urang kudi, Kita jampat ngeransi, Meri jaku jai, Ketegal aku inggar munyi. Kita ga sebana angat, Keba aku datai nulung, Engka sekeda lupa bebai tanggui payung, Ku datai matak remang, Mai penchelap, Mai pengelindap. Manah aku badu bemunyi, Upah kita ngumbai aku jai, Nerumban kita selalat muat gari di pengeredai, Nya aku nadai bepadah, Bebandir rekung kita minta sah, Aku besai nyawa kumbai kita mangah! Semina gambar pengias.  

Dalam pengidup besari-sari penanggul nuntung enda bepadah, nadai betesau jaku gerah, nadai sapa ulih nyeliah ngerarika diri, enti penusah datai pujurka diri enggau manah, anang ngaga penulah ngereja pengawa salah. sekeda penguji tau ngasuh kitai kering agi, sekeda penyamai pan nemu ngasuh kitai majak lemi.  

  Datai ba pengabis maya. Maya, Nuan enda bekaki tang meruan nginsit besari-sari, Ninting ari, Enda alah aku gagai, Makin aku ngerumban awak, makin nuan nadai, Enda alah dilampat. Maya, Nuan mindah enda madah, Uban genara,ngeli rarah, Umur mega nambah,  Tulang berasai majak gerah,  Awak aku enda agi tubah, mayuh diayah. Maya, Kelia pedis dikelala, Enda berasai meleka, Enda ulih dinga pending, Enda ulih dipegai jari kanan kiba, Nadai mega bau, nadai ayu. Tang, Jeman diatu bisi dikena di kuan, Dikaitka ba dinding, Ba kelinda ari bulan, Ba talipaun bincing. Nyah, ulih ga nuan ku peda, Ku pegai, ulih mega diketuka, Ngambi enda segenda nuan ngejang, Ngichaka enda segala-gala nuan lelang, Pemedih mayuh tebantai, Lepi nadai diasai, Rumah muru pulai, Pendam ngelalu penatai. P/S: Gambar rumah panjai admin. Gambar tu diambi maya taun 2019. Bejaku pasal maya, maya agi mit kelia admin sempat diau ba rumah ke begelegar buluh, bedindingka kulit kayu, makai asi ke dipanduk ngena api kay...

Badu nandu. Engka bakatu mih pengujung ya, Pintu pengarap ditikup rapit, Penampak enda ulih enselit, Ke dalam runding sempit, Udah suah ga nguji, tang enti semampai bakatu, engka pemada dek nandu? Pagila matapanas mantaika mua baru, enda ya kala leju naing dunya, Kita pan sama meda, semampai ngasaika ya, ari kelia menya nyentukka saritu, taluk ke dunya, ayan belama. Ukai baka kitai, aku! Enda tegenggamka semaya enda badu ngapa, Pengarap semampai bisi, Seagi kitai deka nguji, Kering ati, Ransing berari. Badu nandu hari lebuh kitai ngasaika diri ngelusu!

KAMI ANAK SARAWAK. Nyentuk ke saritu, haribulan saritu, ribu mensia ke begelar bujang berani udah lesi, lama udah ninggalka kitai, tang bekau jari sida ngasuh kitai idup nyamai, pemedis enggau pemar, rega ke patut dibayar, tanggung pengawa nembiak rebak baru, nyaga ngemata menua, sumpah enda mudah ngaku alah! MERDEKA! kitai rebak baru bejanji enda lemi, taluk ke menua enda bebagi ati, nampung pengawa aki ini kelia ngetanka menua, ngena chara baru, ngena penemu jeman diatu, KAMI ANAK SARAWAK, AGI IDUP AGI NGELABAN, ENDA ALAH KAMI DI TANAH, DI GELANGGANG TETAP MENANG! Kredit gambar: Instagram @enserapengidup Link:  enserapengidup